منیر

ہماہانی نام ءَ کہ پہ وتن نمران انت
منیر مومن

ما گوں درداں مساپر جَلاں بیتگیں
شپ تہار اَت پہ اوستے بَلاں بیتگیں

نوبت ءِ دل گُشۓ تیرے ءَ سُپتگ اَت
تیوگیں اہدا اندوہاں ماں رُپتگ اَت

سُھب ءِ زیبائیں بیرک کہ سر جہل اِتنت
بینگیں بیگہ ءِ رکّ ہم تہل اتنت

گوات ءَ پیتکگ زِرے مچکدگ رُپتگ اَنت
مُرگاں بس موسمانی گِلگ رُپتگ اَنت

دور نہ دات تُنّ وتئی ہچ شند ءِ سرا
کَوش ءَ شینزارتگ آپ بند ءِ سرا

زندگی چو کہ توک ءَ نہ کُت ما گورا
روچ چہ ھون ءِ دریا ءَ کشّیت سرا

سی اِتگ وھدا امروز ءِ دل نیم بیت
ماہ جونانی کوہ ءَ چہ اندیم بیت

زندگی ءِ ابتکیں نگاہاں مہ چار
کس نئیت اِنت اے ویرانیں راہاں مہ چار

نوکیں چاڑے ءُ کیپ یے ملارے بی بیت
گُلزمین ءَ گوں قول ءُ کرارے بہ بیت

زند ءِ بانور ءِ زہیراں مِرگ لازم اِنت
سنگتاں ہَے کن اِت سر گرگ لازم اِنت

گوں تئی زیبائی ءِ ترانگاں سر گِریں
اے وتن روچے پتو ما سد بر مِریں

منیر مومن